Sjaldgæft íslenskt skildingaumslag á uppboði – lágmarksboð $90.000

Félag frímerkjasafnara vill vekja athygli á íslensku skildingaumslagi, sem uppboðshaldarinn Cherrystoneauctions (www.cherrystoneauctions.com) kemur til með að bjóða upp þann 8. júní næstkomandi. Þrátt fyrir útrás og áhuga á mörgu sem Íslandi viðkemur þá hafa íslensk frímerki ávallt verið vinsæl í öðrum löndum. Upphafsboð umslagsins er $90.000 eða um 7.5 milljónir íslenskra króna þegar búið er að bæta við umboðslaunum.   

Einungis eru þekkt 68 umslög með skildingafrímerkjum á, 14 þeirra eru í einkaeigu, hin 54 í eigu safna. Umslagið er einstakt fyrir að vera hið eina þekkta þar sem notað er 3ja skildinga frímerki. Það ber eitt 2ja skildinga merki ásamt pari af 3ja skildinga frímerkjum, samanlagt átta skildingar, en það var burðargjaldið til Danmerkur á tímabili skildafrímerkjanna frá 1873-1875. Bréfið er sent frá Reykjavík þann 17. júní og er komið til Kaupmannahafnar ellefu dögum síðar, eða 28. júní sama ár. Í bók sinni “Íslensk frímerki í 100 ár” segir Jón Aðalsteinn Jónsson í umfjöllun sinni um bréfið að ártalið sé óþekkt. Árið 1873 voru gefin út skildingafrímerki með eftirfarandi verðgildum: 2 skildingar; 3 sk.; 4 sk.; 8 sk. og 16 sk. Innanbæjar burðargjald var á þessu tímabili 2 skildingar, 4 skildingar fyrir innanlands póst, 8 skildingar undir almennt bréf til Danmerkur og 16 skildingar fyrir bréf sem vógu meira en 15 grömm. Ástæða fyrir lítilli notkun 3ja skildinga frímerkja er talin vera vegna þess að ekki var sérstök þörf fyrir það verðgildi nema fyrir bréfasendingar til Noregs (burðargjald 13 skildingar) og Frakklands (19 skildingar).

Aftur í fréttir     Back to news