Skýrsla stjórnar FF fyrir félagsárið 2006/2007

Ágætu fundargestir !

Starf félagsins hefur tekið nokkrum breytingum sl. starfsár en þó hafa félagsfundir verið haldnir annan fimmtudag hvers mánaðar auk þess sem opið hús hefur verið á hverjum laugardegi allt árið.

Helstu atburðir ársins voru sem hér segir:

Á aðalfundi 16. mars 2006 var Brynjólfur Sigurjónsson kosinn formaður félagsins. Aðrir sem kosnir voru í stjórn voru: Jón Ingi Sigursteinsson, Steingrímur Björnsson, Árni Gústafsson, Kjartan Kárason og Sveinn Ingi Sveinsson.

Á fyrsta stjórnarfundi var Sveinn Ingi valinn varaformaður, Árni Gústafsson gjaldkeri og Kjartan Kárason ritari, Jón Ingi Sigursteinsson  varamaður og Steingrímur Björnsson meðstjórnandi.

Í maí var haldið stórt uppboð með 156 númerum.

Engir félagsfundir voru yfir sumartímann, en opið hús engu að síður á laugardögum. Starfið byrjaði síðan af krafti í september.

Sigurður Pétursson fræddi okkur um hvernig setja skuli upp frímerkjasöfn til sýninga á fyrsta vetrarfundinum þann 7. september. Vel var mætt enda margir áhugasamir um að sýna söfn sín er fram í sækir.

Tveimur dögum eftir fyrirlestur Sigurðar hélt Fanney Kristbjarnardóttir stutt og hnitmiðað námskeið í uppsetningu á frímerkjasöfnum með hjálp forritsins “Page Maker”. Sex einstaklingar mættu.

6-7. október var frímerkjasýningin Frímsýn 2006 haldin. Íslandspóstur sendi fulltrúa til að spimpla í tilefni af Degi frímerkisins. Þarna mátti meðal annars líta tvö söfn sem ekki höfðu sést áður, en það voru söfn þeirra Magnúsar Sigurðssonar um sænska lestarstimpla og Don Brands um Færeyjingahöfn.

19. október hélt Indriði Pálsson fyrirlestur um gullverðlaunasafn sitt “Ísland 1838-1903”. Um 30 manns mættu og var gerður góður rómur að þessu framtaki.

Önnur stórkanóna heimsótti okkur 11. nóvember, Ebbe Eldrup og hélt fróðlegan laugardagsfyrirlestur um póststimpla á Kristjáni IX. Rúmmlega 20 meðlimir mættu til að hlusta á Ebbe.

Safnaramarkaður var haldinn daginn eftir þann 12. nóvember í samvinnu við Myntsafnarafélagið.

Laugardaginn 16. desember var jólafundur félagsins haldinn. Fundarstjóri var Sveinn Ingi Sveinsson. Fundurinn var með venjubundnu sniði, en þó breytt út af fundartíma og byrjaði fundurinn klukkan þrjú í stað átta að kvöldi. Margir lögðu hönd á plóginn og voru það frímerkjakaupmennirnir Bolli og Steingrímur sem gáfu vinninga í happdrætti, ásamt góðum stuðningi frá Íslandspósti hf sem er aðalstyrktaraðili fundarins með gjöfum sínum. Ekki var úthlutað úr minningarsjóði Sigurðar Ágústssonar, en enginn unglingur hefur komið fram sem þótt hefur uppfylla þau skilyrði sem sett eru fyrir styrkveitingu.

Á janúarfundi var stór flóamarkaður með yfir 200 númerum. Hann var vel sóttur og seldist meirihluti efnisins.

Á febrúarfundi (15. febrúar nánar tiltekið) kom Eðvarð T. Jónsson frá frímerkjasölu Íslandspósts hf. og flutti fréttir af frímerkjaútgáfum Íslandspósts hf. árið 2007 og ræddi um nýjungar sem fram undan væru. Þessi fundur var mjög gagnlegur söfnurum.

Á öllum félagsfundum voru haldnir flóamarkaðir.

Nokkur fækkun hefur orðið í félaginu á yfirstandandi starfsári enda var tekin ákvörðun um aðhaldsaðgerðir þar eð um 30 manns höfðu ekki borgað félagsgjöld í 3 ár eða lengur. Hafa verður í huga að hver sendur greiðsluseðill kostar 280 kr, hvert Safn um 100 kr og aðildargjöld hvers félaga að LÍF er 500 kr. Í dag fá um 190 meðlimir Safnið, en við stefnum að því að koma virkum meðlimafjölda í 250-300 eftir afmælissýninguna í október.

Þokkaleg aðsókn hefur verið í Síðumúlann á laugardögum og er töluvert um ný andlit. Nokkrir hafa gengið í félagið á starfsárinu.

Umsjón með húsi: Enginn sérstakur hefur séð um umsjón með opnu húsi á laugardögum, en Kristmundur Hannesson hefur séð um að opna húsið klukkan 13:00. Árni Gústafsson sér eins og áður um kaffiveitingar á félagsfundum.

Sýningar félagsmanna: Félagar í FF sendu söfn sín á Nordiu 2006 í Finnlandi og var útkoma góð. Einnig sendu sömu einstaklingar söfn sýn á alþjóðlega sýningu í Malaga á Spáni, Sveinn og Árni fengu góða útkomu en Hjalti fékk óverðskuldaða einkun að flestra mati.

Samstarf við Íslandspóst: Samstarf við Íslandspóst hefur verið gott á liðnu starfsári. Frímerkjasalan hefur keypt auglýsingu af félaginu og styrkt það með því að kaupa helstu verðlista. Auk þess kosta þeir nú heimasíðu Félags frímerkjasafnara www.frimerki.is/ff. Á heimasíðunni er að finna flestar grunnupplýsingar um FF auk fróðleiks um frímerki og frímerkjafræði. Ábyrgðamaður að síðunni var Brynjólfur Sigurjónsson.

Safnaradagar: Safnaradagur voru haldnir tvisvar á sl. ári. Þeir hafa verið haldnir í samvinnu við Myntsafnarafélag Íslands. Þeir voru allir haldnir í Síðumúla 17 og eru menn almennt sammála um ágæti þessara daga.

Styrkur úr Frímerkja- og póstsögusjóði Á síðastliðnu starfsári fékk félagið úthlutað úr Frímerkja- og póstsögusjóði vilyrði fyrir 900.000 krónum. Þessi styrkur er ætlaður til að standa straum af afmælissýningunni í október á þessu ári.

Safnið: Safnið komið út alls 188 sinnum, 8 sinnum á árinu 2006 og hefur komið út þrisvar sinnum á þessu ári og er útlit fyrir að það muni koma út áfram með svipuðu sniði. Nokkru meiri metnaður hefur verið lagður í Safnið á þessu starfsári aðallega með minni fræðigreinum og 1-2 litmyndum. Kostnaður hefur í kjölfarið hækkað nokkuð eins og sjá má á reikningum félagsins. Það hefur því verið nokkuð ánægjuefni að forstöðumenn Íslandspóst hf. hafa auglýst á baksíðu blaðsins, en virði þeirrar auglýsingar stendur að stórum hluta til undir útgáfu Safnsins.

Ýmis verkefni liggja fyrir, er þar helst að nefna afmælissýninguna í október komandi. Nú er ljóst að meðlimir í Islandssamlarna koma til með að fjölmenna til okkar, þeir gera ráð fyrir 40 manna hópi, og vonandi sjáum við annað eins frá öðrum þjóðum.

Fyrir hönd FF

Brynjólfur Sigurjónsson

Aftur á forsíðu     Back