Afmælisörk FF

Undirbúningur fyrir afmælissýninguna 11.-14. október næstkomandi er í algleymingi um þessar mundir. Sýningarörkin hefur verið hönnuð í samvinnu við Frímerkjasölu Íslandspósts og sést útkoman hér fyrir neðan. Um er að ræða mótíf af Friðriki VIII sem Íslandspóstur notaði í 250 kr. örk sem hönnuð er í tilefni af degi frimerkisins. Með upprunalegu örkinni frá Íslandspósti fylgir eftirfarandi fróðleikur:

"Kristján konungur IX færði Íslendingum stjórnarskrána 1874 og féllst á þingræði í Danmörku 1901. Sonur Kristjáns tók við ríkinu sem Friðrik VIII. Hann hafði áratugum saman gegnt konunglegum skyldum og þekkti vel til málefna Íslands. Hann bauð öllu Alþingi í kynnisferð til Danmerkur sumarið 1906 og boðaði komu sína til Íslands sumarið eftir. Í lok júlí 1907 komu gestirnir til Reykjavíkur á tveimur skipum og var herskip til fylgdar. Frá Reykjavík var farið með gestina í vikuferð á hestum um Suðurland. Hátíð var haldin á Þingvöllum með nær sex þúsundum gesta. Leiðin lá síðan til náttúruperlanna Geysis og Gullfoss. Þar var á fossbrúninni skálað í kampavíni fyrir „framtíð Íslands sem iðnaðarlands“. Ekkert var sparað til að gera konungsheimsóknina sem eftirminnilegasta. Á heimleið frá Reykjavík heimsótti konungur kaupstaði hinna landsfjórðunganna: Ísafjörð, Akureyri og Seyðisfjörð. Erfitt samningaferli hófst með þingmannaförinni 1906 en á tólf árum leiddi það til niðurstöðu sem fáa óraði fyrir í upphafi: fullveldis Íslands 1918."

Hægt verður að kaupa örkina bæði númeraða og ónúmeraða, auk þess sem við gerum ráð fyrir að hægt verði að fá hana dagsstimplaða á meðan á sýningunni stendur. Gaman er að geta þess að einn sýnenda, Johnny Pernerfors frá Svíðþjóð, kemur til með að sýna póstkortasafn frá konungsför Friðriks VIII árið 1907.

Aftur á forsíðu     Back