Stjórnarfundur 16. júní 2007

    Fundur haldinn að Síðumúla 17, 16. júní 2007 frá 12:30-13:30. Fundarmenn: Brynjólfur Sigurjónsson, Kjartan Kárason, Árni Gústafsson, Magnús Sigurðsson og Sveinn Ingi Sveinsson.

1. Tillögur varðandi reglur um heiðursfélaga, gull-, silfur-, og bronsmerki félagsins lagðar fram og val á heiðursfélögum fyrir afmælissýninguna í október næstkomandi ræddar. Eftirfarandi reglur voru lagðar fram og samþykktar samhljóða:

Reglur um merki og viðurkenningar Félags Frímerkjasafnara

Bronsmerki

Bronsmerki félagsins geta allir meðlimir félagsins fengið keypt.

Silfurmerki

Allir sem setið hafa í stjórn félagsins í a.m.k. tvö ár, fá afhent silfurmerki. Einnig má úthluta silfurmerki til þeirra, sem hafa að mati stjórnar FF unnið félaginu mikið gagn.

Gullmerki

Einstaklingar sem gegnt hafa trúnaðarstörfum til margra ára fyrir hönd félagsins með góðum árangri, að mati sjórnar, eru sæmdir gullmerki. Einnig má veita gullmerki þeim einstaklingum, sem hafa að mati stjórnar félagsins sýnt framúrskarandi árangur í útbreiðslustarfi á frímerkjasöfnun. Gullmerki er ávallt afhent við virðulega athöfn.

Heiðursfélagi FF

·        Æðsta viðurkenning Félags frímerkjasafnara er nafnbót heiðursfélaga.

·        Heiðursfélagar geta þeir einir orðið sem áður hafa hlotið gullmerki og sýnt hafa frábæran dugnað og áhuga í störfum sínum til eflingar félaginu um langan tíma.

·        Stjórn FF velur á stjórnarfundi þá einstaklinga sem til greina koma sem heiðursfélagar. Heiðursfélagi skal sæmdur heiðursmerki FF og fá um leið formlega viðurkenningu við virðulega athöfn.

·        Heiðursfélagi er kjörinn ævilangt, og er hann undanþeginn greiðslu árgjalda. Honum er ekki skylt að starfa í nefndum félagsins, en hann nýtur allra sömu réttinda og aðrir félagsmenn.

2. Einnig þótti nauðsynlegt að koma á leiðbeinandi reglum varðandi uppboðsnefnd félagsins. Eftirfarandi tillaga var samþykkt:

Reglur varðandi uppboðsnefnd Félags frímerkjasafnara

1.     Uppboðsnefnd heyrir beint undir stjórn Ff.

2.     Ákvarðanir varðandi uppboðsgjöld og aðrar greiðslur tengdar uppboðum eru teknar af stjórn Ff.

3.     Tveir til þrír einstaklingar skipa uppboðsnefnd hverju sinni, valdir af stjórn Ff.

4.     Meðlimir uppboðsnefndar borga eingöngu uppboðsgjald af seldum uppboðsnúmerum. Aðrir seljendur borga fast gjald fyrir hvert uppboðsnúmer, hvort sem það selst eður ei. Kaupendur borga ekki uppboðsgjald.

5. Uppoðsnefnd sér um gerð uppboðslista hverju sinni.

  Auk þess var ákveðið að kanna möguleika á því að auglýsa félagsfundina og flóamarkaðina/uppboðin í Morgunblaðinu. Það kostar innan við 1.000 kr. í hvert skipti og ætti að vekja meiri áhuga á félaginu útávið og ýta frekar á félagsmenn að mæta.

3. Þór Þorsteins ætlar að bjóða Íslandsvinum á afmælissýningunni næsta haust uppá kynningu á Þjóðskjalasafninu á föstudeginum (12. okt.). Hann er tilbúinn að undirbúa slíka kynningu einnig fyrir Íslendinga ef vilji er til þess. Þór fór þess á leit við formann að kanna áhuga á slíkri heimsókn. Frekari ákvarðanir verða teknar að slíkri könnun lokinni.

4. Kaup á nýrri fartölvu rædd í tengslum við auglýsingabækling BT, en ákveðið að bíða með þau kaup fram á haustdaga.

Aftur á forsíðu     Back