Aðalfundur Félags frímerkjasafnara ...

....var haldinn fimmtudaginn 27. mars síðastliðinn. Einn stjórnarmeðlimur gekk úr stjórninni að þessu sinni, varaformaðurinn Sveinn Ingi Sveinsson. Nýr inní stjórn kom sem aðstoðarmaður Jón Ólafsson, en því miður hindruðu lög félagsins því að hægt væri að kjósa hann með formlegum hætti.  Mikið fjör var á uppboðinu eftir fundinn enda áhugavert efni til sölu.

Hér fyrir neðan er að finna skýrslu stjórnar fyrir starfsárið 2007/2008:

Skýrsla stjórnar FF fyrir félagsárið 2007/2008

Ágætu fundargestir !

Starf félagsins hefur tekið litlum breytingum sl. starfsár og hafa félagsfundir verið haldnir annan fimmtudag hvers mánaðar auk þess sem opið hús hefur verið á hverjum laugardegi allt árið.

Helstu atburðir ársins voru sem hér segir: Á aðalfundi 16. mars 2006 var Brynjólfur Sigurjónsson kosinn formaður félagsins. Aðrir sem kosnir voru í stjórn voru: Magnús Sigurðsson, Gestur Baldursson, Árni Gústafsson, Kjartan Kárason og Sveinn Ingi Sveinsson.

Á fyrsta stjórnarfundi var Sveinn Ingi valinn varaformaður, Árni Gústafsson gjaldkeri og Kjartan Kárason ritari, Gestur Baldursson varamaður og Magnús Sigurðsson meðstjórnandi. Við tóku margir undirbúningsfundir næstu mánuðina í tengslum við 50 ára afmælissýningu Ff ReykSýn 2007, sem haldin var í Ráðhúsi Reykjavíkur dagana 11.-14. október 2007. Fundargerðirnar er mögulegt að nálgast á heimasíðu Ff. Hinum eiginlega afmælisdegi var fagnað þann 11. júní með veglegri afmælisköku. Haldinn var stjórnarfundur 16. júní og voru þar samþykktar reglur um merki og viðurkenningar félagsins, ásamt leiðandi reglum varðandi uppboð og uppboðsnefnd Ff. Reglur þessar er mögulegt að nálgast á heimasíðu félagsins. Engir félagsfundir voru yfir sumartímann, en opið hús engu að síður á laugardögum. Starfið byrjaði síðan af krafti í september. 20. september hélt Saso Andonov áhugaverðan fyrirlestur um skipspóst, sem var vel sóttur, yfir 20 manns mættu. Frímerkjasýningin ReykSýn var haldinn eins og áður sagði dagana 11.-14. október og var vel sótt, enda Ráðhúsið í alfaraleið. Var um rætt að sjaldan hefði jafn gott íslenskt efni verið saman komið á einum stað, en vinir okkar í Islandssamlarna frá Svíþjóð sóttu sýninguna heim og áttu um helming sýningaefnis. Fimmtudaginn 15. nóvember hélt Jóhannes Sigmarsson fyrirlestur um brúarstimpla, en hann var einn af sýnendum á ReykSýn.

Safnaramarkaður var haldinn daginn eftir þann 12. nóvember í samvinnu við Myntsafnarafélagið.

Laugardaginn 15. desember var jólafundur félagsins haldinn. Fundarstjóri var Sveinn Ingi Sveinsson. Fundurinn var með venjubundnu sniði, og byrjaði fundurinn klukkan þrjú eins og í fyrra. Margir lögðu hönd á plóginn og voru það frímerkjakaupmennirnir Bolli og Steingrímur sem gáfu vinninga í happdrætti, ásamt góðum stuðningi frá Íslandspósti hf sem er aðalstyrktaraðili fundarins með gjöfum sínum. Ekki var úthlutað úr minningarsjóði Sigurðar Ágústssonar, en enginn unglingur hefur komið fram sem þótt hefur uppfylla þau skilyrði sem sett eru fyrir styrkveitingu.

Á janúarfundi hélt Brynjólfur Sigurjónsson fyrirlestur um gagnagrunn á sviði númerastimpla. Fyrirlesturinn var óvenju illa sóttur, ekki mættu nema rúmlega 10 manns. Talið var að handboltaleik hefði verið um að kenna!

Tveimur dögum eftir fyrirlestur Brynjólfs hélt Fanney Kristbjarnardóttir stutt og hnitmiðað námskeið í uppsetningu á frímerkjasöfnum með hjálp forritsins “Page Maker”. Rúmlega 10 einstaklingar mættu.

Á febrúarfundi (21. febrúar nánar tiltekið) kom Eðvarð T. Jónsson frá frímerkjasölu Íslandspósts hf. og flutti fréttir af frímerkjaútgáfum Íslandspósts hf. árið 2008 og ræddi um nýjungar sem fram undan eru. Þessi fundur var mjög gagnlegur söfnurum og vel sóttur.

Á öllum félagsfundum voru haldnir flóamarkaðir í boði uppboðsnefndar en í henni starfa: Gestur Baldursson, Sveinn Ingi Sveinsson og Gísli Harðarsson, og eiga þeir lof skilið fyrir mikið vinnuframlag. Er þeim hér með þökkuð óeigingjarnt starf á síðasta starfsári.

Nokkur fjölgun hefur orðið í félaginu á yfirstandandi starfsári og losa meðlimir nú annað hundraðið á nýjan leik.

Umsjón með húsi: Enginn sérstakur hefur haft umsjón með opnu húsi á laugardögum, en Kristmundur Hannesson hefur séð um að opna húsið klukkan 13:00. Árni Gústafsson sér eins og áður um kaffiveitingar á félagsfundum.

Sýningar félagsmanna: Félagar í FF sendu söfn sín á eftirfarandi sýningar á síðasta starfsári: Eyfrím 2007 haldin á Akureyri 28. apríl 2007, Alþjóðleg frímerkjasýning í Sankti Pétursborg Rússlandi 19.-25. júní 2007 og ReykSýn 2007 haldinn 11.-14. október 2007.

Samstarf við Íslandspóst: Samstarf við Íslandspóst hefur verið gott á liðnu starfsári. Frímerkjasalan hefur keypt auglýsingu af félaginu og styrkt það með því að kaupa helstu verðlista. Auk þess kosta þeir nú heimasíðu Félags frímerkjasafnara www.frimerki.is/ff. Á heimasíðunni er að finna flestar grunnupplýsingar um FF auk fróðleiks um frímerki og frímerkjafræði. Fljótlega á nýju almanaksári 2008 varð ljóst að ekki yrði um meiri samvinnu að ræða milli Ff og Myntsafnarafélags Íslands um Safnaradaga. Var því tekin sú ákvörðun að Ff stæði í staðinn fyrir svokölluðum „Markaðslaugardögum“. Þeir eru haldnir fyrsta laugardag í hverjum mánuði og auglýstir sérstaklega í fjölmiðlum. Tveir slíkir hafa verið haldnir og hafa gefist ágætlega.

Á síðastliðnu starfsári fékk félagið úthlutað úr Frímerkja- og póstsögusjóði 500.000 krónum fyrir Reyksýn 2007.

Safnið: Safnið hefur komið út alls 197 sinnum, 8 sinnum á árinu 2007 og hefur komið út þrisvar sinnum á þessu ári og er útlit fyrir að það muni koma út áfram með svipuðu sniði. Ff stóð í fyrsta sinn í langan tíma að útgáfu fræðirits. Um var að ræða bókina „brúar-, rúllu- og vélstimplar Íslandspósts hf“. Höfundar ritsins voru þeir Þór Þorsteins og Gestur Baldursson. Prentkostnaður nam 120.000 kr en á móti kom styrkur frá Frímerkja-og póstsögusjóði að upphæð 100.000 kr. Nokkuð seldist af ritinu á Reyksýn.

Ýmis verkefni liggja fyrir, er þar helst að nefna frímerkjasýningu í tengslum við aðalfund LÍF dagana 23.-25. maí næstkomandi og undirbúningur fyrir Nordiu 2009 sem haldinn verður í Hafnarfirði.

Fyrir hönd FF

Brynjólfur Sigurjónsson

Aftur á forsíðu     Back