Afbrigði á yfirprentun frá 1926

(Höfundur: Brynjólfur Sigurjónsson)

Starfræktur er í Danmörku Íslandsklúbbur og gefur hann út rit sem nefnist Islands kontakt. Í riti númer 65 gefið út í maí 2008 var áhugaverð grein um afbrigði sem minnst er á í verðlistanum Facit sem 159 v1. Um er að ræða lítinn krók á vinstri hlið “E” á yfirprentuninni “EIN KRÓNA”. Einungis eitt frímerki í hverri örk ber afbrigðið og þar sem upplag frímerkisins var 100.000, er ljóst að einungis 1.000 frímerki bera afbrigðið góða. Fram til þessa hefur það verið á huldu hvar í örkinni afbrigðið var staðsett. Leyndardómurinn opinberaðist ekki fyrr en nýlega við tiltekt í geymslu Félags frímerkjasafnara. Þar fundust í stórri möppu gamlar svarthvítar ljósmyndir uppstækkaðar af örkum íslenskra frimerkja. Þar á meðal var örkin af fyrrnefndri yfirprentun frá 1926. Við nánari eftirgrenslan kom í ljós að afbrigðið fannst staðsett í örkinni í sæti númer 59.

Umrætt afbrigi, krókurinn á “E”-inu.

Þess má að lokum geta að ljósmyndir arkanna eru upprunnar úr Hans Hals safninu og voru prentaðar árið 1973 á hundrað ára afmæli íslenska frímerkisins að undirlagi meðlima Félags frímerkjasafnara. Hugsunin var sú að meðlimir hefðu möguleika á að skoða galla í prentunum án þess að þurfa að fara í upprunalegu arkirnar.

Aftur á forsíðu     Back