Athyglisverð blekógilding

(Höfundur: Kjartan Kárason)

Flestir safnarar hafa séð frímerki ógild með svokallaðri blekógildingu. Af einhverjum ástæðum gat viðkomandi póststarfsmaður ekki ógilt frímerki með hefðbundnum póststimpli heldur notaðist hann við blekpenna. Ef til vill var póststimpillinn eða stimpilpúðinn ekki tiltækur, en væntanlega má gera ráð fyrir að oft hafi blek vantað. Að sögn Þórs Þorsteins má finna nokkur dæmi um það í gögnum póstsins að póststarfsmenn hafi kvartað yfir að þeim vantaði blek til að ógilda með. Engar reglur hafa hinsvegar fundist

um það hvernig ætti að ógilda frímerki þegar ekki var hægt að nota hefðbundinn póststimpil. Algengt er að sjá blekógildingu þar sem krossað hefur verið yfir frímerkið. Einnig má finna ógildingar þar sem staðarnafnið hefur verið handskrifað á frímerkið. Á þessu frímerki, 10 aurar Kristján 9., má sjá athyglisverða ógildingu þar sem krossað hefur verið yfir frímerkið og gefin ástæða fyrir blekógildingunni. Hún er “Vantar svertu”, sem vísar þá til þess að blek hafi vantað til að stimpla með. Áhugavert væri að vita hvar þessi blekógilding var notuð. Ef safnarar eiga bréf sem geta staðsett þessa notkun þá væri fróðlegt að fá slíkar upplýsingar.

Aftur á forsíðu     Back