Fréttir

Saga Félags frímerkjasafnara The clubs history

(unnið úr afmælisritum FF eftir Jón Aðalstein Jónsson)

28. maí árið 1957 hittust nokkrir frímerkjasafnarar í Þjóðleikhúskjallaranum til að ræða stofnun á frímerkjafélagi. Stofnfundur var svo haldinn hálfum mánuði síðar eða þriðjudagin 11. júní sama ár í Tjarnarcafé. Stofnendur FF voru 35 talsins.

Fyrstu lög félagsins voru svo hljóðandi:

1. gr.

Félagið heitir Félag frímerkjasafnara. Lögheimili þess er Reykjavík.

2. gr.

Tilgangur félagsins er: að glæða áhuga á frímerkjasöfnun og að efla gagnkvæm viðskipti félaga sinna.

3. gr.

Tilgangi sínum hyggst félagið ná með reglulegu fundarhaldi, fyrirlestrum, upplýsinga- og útgáfustarfsemi.

4. gr.

Félagsmaður getur hver sá orðið, sem hlýtur samþykki stjórnarinnar og náð hefir 21 árs aldri.

5. gr.

Inntökugjald í félagið er 100 kr., árgjald 50 kr. Inntökugjald gildir jafnframt sem árgjald fyrir það ár, sem gengið er í félagið.

6. gr.

Greiði félagsmaður ekki félagsgjald í 2 ár samfleytt, skal líta á það sem úrsögn hans úr félaginu.

7. gr.

Stjórn félagsins skipa 5 menn: formaður, varaformaður, ritari, gjaldkeri og spjaldskrárritari. Stjórnin skal kosin skriflega á aðalfundi þannig: formaður til eins árs, aðrir stjórnendur til tveggja ára, þó þannig að tveir ganga úr eftir eitt ár. Skulu þeir dregnir út með hlutkesti á fyrsta stjórnarfundi eftir að stjórnin kemur saman. Enn fremur skal kjósa 2 endurskoðendur. Stjórnin skiptir sjálf með sér verkum.

8. gr.

Stjórn getur vikið mönnum úr félaginu, álíti hún framkomu þeirra félaginu til vanza. Þó getur viðkomandi fengið málið tekið fyrir á félagsfundi.

9. gr.

Reikingsár félagsins er almanaksárið.

10. gr.

Aðalfund skal halda eigi síðar en 15. febrúar ár hvert. Til aðalfundar skal boða með skriflegri tilkynningu með minnst viku fyrirvara, og er hann lögmætur án tillits til þess, hve margir mæta. Á aðalfundi skulu mál tekin fyrir í þeirri röð sem hér segir:

a) Stjórnin gefur skýrslu um hag félagsins og störf á liðnu starfsári og leggur fram endurskoðaðan reikning félagsins til samþykktar.

b) Lagabreytingar.

c) Kosin stjórn og fastar nefndir.

d) Önnur mál.

Á aðalfundinum ræður meirihluti atkvæða úrslitum allra mála. Ef atkvæði eru jöfn, ræður atkvæði fundarstjóra úrslitum, enda sé hann ekki úr stjórn félagsins.

11. gr.

Verði félaginu slitið, skulu eignir þess renna til Rauða kross Íslands.

12. gr.

Lögum þessum má ekki breyta nema á aðalfundi með samþykki minnst 2/3 hluta atkvæða.

Fundarstaður

Í Tjarnarcafé (eða Oddfellow húsinu) voru fyrstu félagsfundirnir haldnir, eða fram til vorsins 1959 en þá flutti FF starfsemi sína í Sjálfstæðishúsið. Næstu ár var starfsemi félagsins víða haldin, má þar nefna Breiðfirðingabúð (uppi), Tjarnarcafé og fundasal pósthússins við Austurstræti. Á aðalfundi FF 1966 var Gísli Sigurbjörnsson kosinn formaður og leysti hann úr húsnæðisvanda félagsins með því að útvega starfseminni stað í föndursal Elliheimilisins Grundar.

Fyrsti fundur FF á þessum stað var haldinn í apríl 1966 og sá síðasti í nóvember 1977. Auk fastra funda voru haldnir svokallaðir skiptifundir tvisvar til þrisvar í viku. Fyrstu árin voru skiptifundir þessir haldnir í Garðastræti 8 en á aðalfundi 14. apríl 1959 var samþykkt að flytja starfsemi þessa að Amtmannsstíg 2.

Árið 1969 fékk félagið mun rýmra herbergi á 2. hæð í kvistherbergi, sem veit út að Amtmannsstíg. Eigandi hússins, Ellen Sighvatsson gekk í FF og hélst því um langt skeið gott samband við hana um nýtingu á húsnæðinu til handa félagsins.

Verður þáttur Ellenar í margs konar störfum fyrir félagið seint fullmetinn og raunar aldrei þakkaður sem skyldi, því hún var vakin og sofin yfir hag FF og velferð félaga og gesta, sem í herbergið komu. Sá hún til að mynda um að alltaf væri heitt á könnunni og eitthvað með, þegar herbergið var opið.

17. janúar 1985 flutti FF loks starfsemi sína í Síðumúla 17. Landssamband Íslenskra Frímerkjasafnara (LÍF) keypti það húsnæði fyrir ágóða af frímerkjasýningunni NORDIA 84 og FF leigir þar sal undir starfsemi sína enn þann dag í dag.

Frímerkjasýningar

Á fyrsta stjórnarfundi 7. október 1957 lét stjórnin útbúa einn ramma til reynslu eins og segir í fundargerð. Árið eftir var svo frímerkjasýningin FRIMEX 1958 haldin í Bogasal Þjóðminjasafnsins, aðallega til þess að "kynna fólki helztu frímerkjasöfn sem til voru á Íslandi, og í öðru lagi til þess að vekja áhuga manna á frímerkjasöfnun og gildi hennar.

Árið 1964 var næsta sýning á vegum Félags frímerkjasafnara haldin í Iðnskólanum 3-10. október, í beinum tengslum við Dag frímerkisins 7. október. Miðað var við að sýning þessi yrði ekki mjög umfangsmikil, heldur reynt að sýna sem fjölbreyttast úrval íslenzkra frímerkja, sérstimpla og annars sem tengt er íslenskri frímerkjasöfnun.

Árið 1967 varð félagið 10 ára og að því tilefni var ákveðið að halda frímerkjasýningu í Bogasal Þjóðminjasafnsins, á sama stað og fyrsta sýningin hafði verið haldin. Sýningin var haldin undir nafninu "Hans Hals - Filex 67". Í ritskránni var birt ritsmíð um Hans Hals og safn hans. Dóttir Hans Hals, Anne-Cathrine Hals var boðið að vera viðstödd sýninguna og opnaði hún hana formlega.

Fjórða frímerkjasýning Félags frímerkjasafnara var haldin 17.-22. júní 1969 í Hagaskóla og var hún kölluð FRÍM 69. Sú sýning var haldin til að minnast 25 ára afmælis lýðveldis á Íslandi. Og þess vegna voru einungis sýnd íslensk frímerki og annað frímerkjaefni frá lýðveldinu.

Stærsta frímerkjasýningin fram að þeim tíma var svo haldin árið 1973 "ISLANDIA 73" 31.ágúst - 9. september í tilefni af 100 ára afmæli íslenskra frímerkja, en skildingamerkin, fyrstu íslensku frímerkin, voru gefin út 1873.

ISLANDIA 73 er talin vera mesta þrekvirki íslenskra frímerkjasafnara. Sérstök heiðursdeild var á sýningunni og einum safnara frá hverju hinna Norðurlandanna boðið að sýna þar úr Íslandssafni sínu það sem hann hafði mestar mætur á. Af þeim mönnum sem þekktust boðið var verkfræðingurinn Folmer Østergaard talin þekktastur, ásamt Sir Athelstan Caröe, ræðismanni Íslands í Liverpool. Sir Athelstan var mikill Íslandssafnari og rannsakaði íslensk frímerki og stimpla ásamt póstsögu okkar betur en nokkur annar erlendur maður á þeim tíma segir Jón Aðalsteinn Jónsson í afmælisriti Félags frímerkjasafnara 25 ára sem gefið var út Reykjavík 1982.

Næstu sýningar voru sem hér segir:

1) FRIMEX 77 (20 ára afmæli Félags frímerkjasafnara)

2) FRÍM 80 að Kjarvalsstöðum 6-10. nóvember.

3) FRÍMEX 82 haldið í tilefni af 25 ára afmæli FF

4) FRÍMEX 87 haldið í tilefni af 30 ára afmæli FF

Frímerkjauppboð

Frímerkjauppboð voru strax í upphafi sögu Félags frímerkjasafnara ómissandi þáttur í starfsemi félagsins og eru reyndar enn þó með breyttu sniði séu. Þegar á öðrum fundi FF í nóvember 1957 var haldið lítið frímerkjauppboð. Voru þá boðin upp fimm Ballonumslög, sem seldust á 160 - 200 krónur. Í desember sama ár voru boðnar upp nokkrar arkir af 5/35 aura Heklu sem seldust á 300 krónur. Í fundargerð er þess getið að mikill áhugi hafi verið fyrir kaupum merkja á uppboðinu. Svo vel gengu uppboðin að í október 1959 var kosin 3ja manna nefnd til þess að gera tillögur um uppboð. Í framhaldinu var kosin sérstök uppboðsnefnd sem í sátu Einar Þ. Matiesen, Magni R. Magnússon og Þór Þorsteins.

Árið 1961 var ákveðið að halda uppboðin á félagsfundum. Breyting á þessu formi varð árið 1966 en það ár lagði formaður félagsins Gísli Sigurbjörnsson fram að haldin væru opin uppboð og fékkst til þess leyfi frá yfirvöldum til að halda opinber uppboð. Fyrsta slíka uppboðið var haldið 21. nóvember 1966 í Átthagasal Hólel Sögu. Mættir voru 60 manns og fjöldi númera voru 94 + 3 aukanúmer, þar af seldust 71 númer.

Almenn frímerkjauppboð FF voru haldin í Átthagasal Hótel Sögu fram til 1976, eftir það í Ráðstefnusal á Hótel Loftleiðum. Söluskattur varð til þess að uppboðin urðu að innanfélagsuppboðum, þar sem einingis félagsmenn gátu boðið í númer. Á afmælisárinu, 1982 var haldið veglegt frímerkjauppboð á vegum FF í Ráðstefnusal Hótels Loftleiða, en á því uppboði voru boðin upp 446 númer og seldust nær öll.

Um félagið About the club