Hvammstangi 1963

(eftir Gest Baldursson)

Pósthúsið á Hvammstanga hafði til umráða tvo póststimpla árið 1963, brúarstimpla af gerðunum B2c1 og B8e. Sá eldri (B2c1) hafði verið notaður frá árinu 1914 og seinni gerðin (B8e) var samkvæmt heimildum afhent til notkunar árið 1963 og tekin úr notkun árið 1988. Þekktar eru afstimplanir af hinum fyrri fram til janúarloka 1963 og afstimplanir af hinum seinni þekkjast frá seinni hluta ársins.

Nú eru þekktar a.m.k. fimm afstimplanir af meðfylgjandi stimpli, bláum ferhyrndum stimpli með áletruninni “Póstur og sími – dagsetning – Hvammstangi”. Spanna dagsetningar þeirra allra tímabilið 2. – 17. febrúar 1963. Ekki er vitað með vissu hvers vegna gripið var til þessa stimpils, né heldur hvenær og af hvaða tilefni hann var búinn til. Hafði gamli brúarstimpillinn B2c1 skemmst eða týnst? Gæti verið að millibilsástand hafi skapast meðan beðið var eftir nýja stimplinum B8e? Og af hverju þekkist meðfylgjandi blái Pósts&Síma stimpillinn aðeins frá í febrúar? Með hvaða hætti voru frímerki á pósti frá Hvammstanga ógilt framá haustið?

Allar nánari upplýsingar og ábendingar varðandi póst frá Hvammstanga árin 1962 -1966 væru vel þegnar. Þetta er póstsögulegt gat sem vert er að stoppa í !

Gestur Baldursson sturi@mi.is

Aftur í útgáfur     Back to publication