Íslenski fáninn á frímerkjum

Höfundur: Gestur Baldursson

Hinn íslenski þjóðfáni, sem og ríkisfáni Íslands og skjaldarmerki hafa nú prýtt íslensk frímerki með reglulegu millibili í 77 ár.  Hinn þríliti fáni, sem á rætur sínar að rekja til ársins 1906 og fyrst dreginn að húni þann 1.desember 1918, prýddi fyrst frímerki árið 1930, 40 aura merkið úr Alþingishátíðarseríunni.  Alls hefur fáninn í hinum ýmsu myndum komið við sögu á rúmlega 25 frímerkjum og smáörkum síðan þá, síðast sem hluti jólaskrauts á 45 króna jólafrímerki ársins 2002.  Einnig hefur fáninn prýtt forsíður a.m.k. tveggja frímerkjahefta. 

Skjaldarmerki Íslands hefur einnig komið við frímerkjasöguna, til að mynda má finna landvættamerkið fyrra á Leifs Eiríkssonar blokkinni frá 1938, lýðveldismerkið á 20 ára afmælismerkinu frá 1964 og gamla fálkaskjaldarmerkið má svo sjá á 250 króna Landsbankamerkinu frá 1986.   Skjöldurinn einn og sér hefur einnig ratað á nokkur merki, einkum á afmælis- og hátíðarútgáfur hverskonar.

Segja má því að fáninn og skjaldarmerkið séu samofin frímerkjasögu lands og þjóðar, og fátt komið jafnoft við sögu sem myndefni á löngum ferli íslenska frímerkisins.   

Íslenski fáninn hefur einnig prýtt frímerki annara landa. Hér má sjá hann á merkjum Sameinuðu þjóðanna (úr fánaseríunni frá 1986) og á merki frá Portúgal (í tilefni 25 ára afmælis EFTA árið 1985).

Aftur á forsíðu     Back